عصافير وزهور

عصافير وزهور

فيه شخص عزيز عليا جدا كل مابيشوفنى بيقولى انتى تنفعى تبقى مذيعة علشان يعنى بتكلم كل سنه مره زى مابيقولو لدرجة انى لما بشوف مذيعة رغايه بفتكر كلامه واضحك .... بس فى مره فكرت لو صحيح بقيت مذيعة ممكن اقدم برنامج شكله اييييييه؟؟؟

لقيت بقى حاجات كتيييييير يعنى ممكن مثلا اجيب دكتور من اللى كانو بيصدعونا ايام المحاضرات واستضيفه بتاع خمس دقايق كده هقدمه للناس واتكلم انا بقى براحتى وهو يقول امين ..ايوه تمام.. مظبووط وأول ما تسوله نفسه انه يقول لأ على حاجه اقوله انه قال الكلام ده مره قبل كده وبعدين اشكره واوعده هو والمشاهدين بلقاءات تانيه مفيده طبعا بس لقيت انى مش هقدر استحملهم فى الكليه والتلفزيون كمان

رجعت افكر تانى مممم قلت مافيش غير ستات البيوت يعنى نعلمهم حاجه جديده غير المسقعه ونقدملهم برنامج طبخ جااامد ونجيب شيف غريب بيعمل اكلات غريبه بمكونات اغرب حاجات كده زى السلطعون وعرف الديك الاخضر وطبعا وهو شغال لازم نسليه بشوية اسئله زى مثلا كيفيه حل الخلافات الزوجيه (على اساس يعنى ان الراجل والست زى الفرخه والديك) ولان الحاجات اللى طلبها الشيف مش هنلاقيها قلنا نعمل فقره تانيه عن الموضه واخر صيحه فى اللبس وقصات الشعر وكان لازم ندى للقصه (بضم القاااف) حقها بس الحقيقه الكوافير كان مشغوول

قلت خلاص مش باقى غير الشباب ..مستقبلنا.. نعملهم برنامج روش طحن نحاول نقرب فيه منهم ويبقى فيه ترابط بين الاجيال واول حلقه هتكون عن مشكله كبيره تؤرق الشباب من الجنسين وهيا (يعنى ايه ولد مز وبنت مزه)

بعد كل ده لقيت انى مش هعمل حاجه جديده بالعكس انا شفت كل ده قبل كده ولو حد متابع او حتى مش متابع اكيد هيكون شاف الحاجات دى كلها بالنص فى برامجنا الجميله

لقيت بقى احسن ليا وللضيوف اخلينى مع حبايبى الصغيرين نعمل برنامج امور كده نلعب ونتكلم ونتعلم فيه ونرحمهم شويه من البرامج اللى كلها فكره واحده من ايام ماخترعوا التلفزيون والسؤال اللى كان بيعقدنى انا شخصيا من كل البرامج وبشفق على العيال منه بصراحه(ها يا حبيبى استفدت ايه من القصه دى) طب اول واحد هيقول والتانى ممكن والتالت شرحه لكن العاااشر هيلاقى كلام فيييين خصوصا انه فيه مذيعه كده تبقى رزله وتقوله لااا ياحبيبى قول حاجه جديده صاحبك قال دى مره انا لو مكانه هقولها قولى انتى ههههههههههههه وتبقى تقابلنى لو قالت حاجه

عصافير وزهور ده بقى هيكون اسم البرنامج ان شاااااااااااااااء الله و اللى فوق دول هيكونو ضيوف أول حلقه باذن الله